- Vostede confía na capacidade de mellora do proceso de Boloña, pero entre os alumnos cunde o descoñecemento e entre os poucos que falan del abunda o temor á privatización.
- O discurso que máis se proxecta entre o estudantado –non digo que o que máis impera– é anti-Boloña, e para min denota un descoñecemento enorme. Este non é un proceso de clonificación de universidades, senón de harmonización, que permite a mobilidade de alumnos e profesionais, na liña do Erasmus, un dos programas más importantes da UE. A reforma procura ademais títulos que se axusten mellor ao mundo laboral, algo que non entendo que rexeite ningún estudante, como tampouco a atención máis individualizada. Sobre a privatización, pois mire, desde hai dous anos, ofertamos másteres a prezos oficiais. Ata entón, pagábanse a prezo de mercado. Se fose estudante, a miña loita sería por unhas taxas máis equitativas que as actuais, que benefician as rendas altas. Deberían achegarse máis ao custe real, pero con máis bolsas que, ademais de cubrir taxas, desen máis apoio ao mantemento.
